މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ 4 ވަނަ ކޮންގްރެސްގައި 1100 އަށްވުރެ މީހުން ރެޖިސްޓްރީ ވެއްޖެ ކަމުގައި އެމްޑީޕީ އިން ހާމަކޮއްފިއެވެ،

ކޮންގްރެސް ކޮމެޓީގެ މުޤައްރިރު އިބްރާހިމް ވަހީދު (އިބްރޭ) ވިދާޅުވިގޮތުގައި ، ޖުމްލަ 1447 މީހުން މިފަހަރުގެ ކޮންގްރެސްގައި ބައިވެރިވުމުގެ ޙައްޤު ލިބިގެންވެއެވެ.

އިބްރޭ ވިދާޅުވީ މިއީ މިހާތަނަށް އިންތިޚާބުވެފައިވާ އެންމެ ގިނަ ފަރާތްތައް ބައިވެރިވާނެ ކޮންގްރެސް ކަމަށެވެ. އެގޮތުން، ޤައުމީ މަޖިލީޙުގެ މެމްބަރުންނާއިޕްރޮވިންސް ސިޓީ އަދި ދާއިރާތަކުގެ ނާއިބު ރައީސުންނާއި މޭޔަރުން ޕާޓީގެ ކައުންސިލަރުންނާއި ގޮފިތަކުގެ ރައީސުން މީގެ ތެރޭގައި ހިމެނެއެވެ.

އިބްރޭ ވިދާޅުވީ އެމްޑީޕީ ކޮންގްރެސް ފެށުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ 19 ވަނަ ދުވަހުގެ ރޭ 08:00 ން 11:00 ށެވެ. އަދި ކޮންގްރެސް ނިންމުމަށް ހަމަޖެހިފައިވަނީ 21 އޮގަސްޓުގެ ރޭގަނޑު 08:00 ން 11:30ށެވެ.

މި ކޮންގްރެސްގައި ބައިވެރިވާ މަންދޫބުންނާއި ސަރުކާރުގެ މުއައްސަސާތަކާ ބައްދަލުކޮށް، ރަށްތަކުގެ ތަރައްގީއަށް ކުރާ މަސައްކަތްތަކާއި ކުރިއަށް ހުރި އިންތިޚާބުތައް ކާމިޔާބު ކުރުމަށް ކުރަމުން އަންނަ މަސައްކަތްތަކާ ގުޅޭ ގޮތުން މަޝްވަރާ ކުރުމަށް ވެސް ވަނީ ހަމަޖެހިފައެވެ. މިއީ މިފަދަ ފުރުސަތެއް ލިބޭ ފުރަތަމަ ކޮންގްރެސްއެވެ.

މި ކޮންގްރެސްގައި ބައިވެރިވުމަށް އެމްޑީޕީގެ އިސް ބޭފުޅުންގެ އިތުރުން ރާއްޖޭގެ ސިޔާސީ އެހެން ޕާޓީތަކަށް ވެސް ދައުވަތު އަރުވަން ވަނީ ނިންމާފައެވެ.